wordpress counter

„UN“ диета

„UN“ ДИЕТА

Последниов период, таканаречената UN диета е мошне популарна кај нас. Познавам барем 10-тина луѓе кои строго се придржуваат кон неа, подготвувајќи се за летните одмори. Според оние кои ги прашавме, сите постигнале некаков резултат. Кој повеќе кој помалку, ама сите бележат намалување на бројот на килограми. Редакцијата на Гурман™ се потруди да ви ја презентира оваа диета, бидејќи искрено посакуваме сите наши посетители да бидат задоволни со својата телесна тежина.

UN диетата е диета која трае цели 90 дена (значи е наменета само за оние со многу упорност и трпеливост). Нејзината популарност произлегува од фактот не само што помага во намалување на тежината, туку дејствува и на метаболизмот. Така, целта на оваа диета е да го спречи повторното враќање на претходно загубените килограми.

Во овој период од 90 дена можете да ослабете од 18-25 килограми. Ако сакате да намалите помалку килограми, тогаш едноставно прекинете ја диетата порано.

Оваа програма на исхрана се состои од 4 дена кои се повторуваат.

Појадокот е секогаш ист. Овошје и тоа во парови: 2 јаболка, 2 портокала, 2 круши или пак 2 раце ситно овошје: цреши, боровинки и слично.

1. ДЕН НА ПРОТЕИНИ
Месо, јајца, риба и други извори на протеини како и некалоричен зеленчук во големи количини. Овој пристап вели дека протеините заситуваат, но и го успоруваат метаболизмот. На овој начин доаѓа до стимулација на глуконеогенеза, која е важен дел во создавањето енергија за лицето кое е на диета. Освен тоа, протеините го спречуваат губењето на мускулната маса.

РУЧЕК
Можете да приготвите 3 парчиња варено или печено месо или 3 варени јајца, 1 парче леб и салата во неограничена количина. Овој ден се дозволени и сирење и млеко, но ако веќе се решите да ги консумирате за таа количина на внес на овие два производа треба да ги намалите месото или јајцата. Една шолја супа без тестенини (200 децилитри), како дополнување на ручекот.

ВЕЧЕРА
Исто како и ручекот, но без супата. Важно е да знаете дека ако сте ручале месо мора да вечерате месо. Или пак јајца. На вас е да решите за што сте расположени.

2. ДЕН НА СКРОБ
Доаѓа веднаш после протеинскиот. Метаболизмот е насочен кон глуконеогенезата, залихите на скроб во мускулите и црниот дроб се потрошени, па јаглехидратите кои во нормални услови би го стимулирале складирањето на масни наслаги не може така ефикасно да се користат во таа намена.

РУЧЕК
Грав, грашок, ориз или компир, исклучиво варени, а може да бидат и зачинети. Едно парче црн или интегрален леб и салата.

ВЕЧЕРА
Истото од ручекот, но само половина од количината.

3. ДЕН НА ЈАГЛЕХИДРАТИ
Награда за сетилата и вентил за опуштање за сите оние со слаба контрола врз изборот на јадења.

РУЧЕК
Варени тестенини со зачини, солено печиво, пица вегетаријана.

ВЕЧЕРА
Две парчиња торта, 3-4 колачиња, 3 топки сладолед и задолжително еден ред чоколадо за готвење.

4. ДЕН НА ОВОШЈЕ
Било кое мешано овошје. Дополнително, еднаш месечно треба да воведете т.н. воден ден кога цел ден пиете само вода, а по него задолжително следи протеински ден.

ОСНОВНИ ПРАВИЛА ПРИ ПРИМЕНА НА ОВАА ДИЕТА
• Строго придржувајте се кон распоредот
• Не е дозволено прескокнување на оброците
• Не смеете да јадете помеѓу оброците
• Што е можно повеќе јадете салати, свеж зеленчук и овошје
• Кафе и чај може да се пијат, но без шеќер
• Соковите сведете ги на минимум
• Препорачливо е да земате барем една витаминска таблета дневно
• Наместо шеќер користите вештачки засладувачи
• Оваа диета може да ја повторите по пауза од 3 месеци

Related Posts with Thumbnails