Чурос се шпански крцкави крофни во форма на стапчиња, превкусен крцкав десерт кој се служи со растопено чоколадо. Брзински за подготовка посебно ако ви се најават гости а немате ништо благо по дома. Овој е омилениот безглутенски рецепт на @cookingwithviki и е многу поубав од стандардниот бидејќи се многу покрцкави. Се надеваме дека ќе ви се допаднат и вам.
Безглутенски Чурос
Состојки
- 300гр пченкарно брашно или друго безглутенско
- 2 лажици густин
- 250мл вода
- 1 лажиче шеќер
- прстофат сол
- 1 пакетче ванилин шеќер
- 50гр путер
- 2 јајца
За валкање:
- шеќер кристал промешан со цимет
Чоколаден прелив:
- 100гр чоколадо
- 50мл слатка павлака
- 50мл млеко
- масло за пржење
Инструкции
- Водата ја ставаме на оган да зоврие заедно со путерот го додаваме шеќерот, ванилата, солта и брашното и на крај мешаме цело време на оган додека да не се соедини смесата убаво. Тргаме настрана и оставаме да се излади. Во изладената смеса ги додаваме јајцата едно по едно и матиме со миксер.
- Во меѓувреме го ставаме маслото на оган да се загрее. Смесата ја ставаме во шприц со ѕвездеста форма и спуштаме во маслото од тестото долги стапчиња околу 5см. Ги пржиме од двете страни додека да добијат убава златна боја, и одма ги валкаме во смесата со шеќер и цимет. Служиме со чоколаден сос или прелив (чоколадото ситно сецкано го топиме заедно со павлаката и млекото до точка на вриење). За кратко време имате вкусен десерт прелесен за подготвување! Имајте убава вечер и уживајте во секој миг!