Идеален роденденски подарок за вашите најмили е токму домашно направена роденденска торта. Оваа убавица направена од thebakeaway е составена од два вида тесто и два чоколадни фила – едниот од бело чоколадо и плазма бисквити, а другиот од црно чоколадо и мешавина од мелени ореви и лешници.
Snowball Торта
Состојки
Чоколадно тесто
- 6 јајца
- 14 големи лажици мешавина од мелени ореви и лешници
- 5 големи лажици шеќер
- 4 големи лажици брашно
- 1 чоколадо за готвење исецкано на мали коцки
- Изрендана кора од портокал
- Сок од портокал
- Прашок за пециво
- Малку сол
Павлова тесто
- 4 белки на собна температура
- Малку сол
- 200гр шеќер
- 2 мали лажици густин
- 2 мали лажици бел вински оцет
Фил со млечно чоколадо
- 50-60мл млеко
- 300гр шеќер
- 250гр мешавина од мелени лешници и ореви
- 100гр млечно чоколадо
- Изрендана кора од портокал
- Сок од портокал
- 4 жолчки
- 2 големи лажици какао
- 150гр маргарин
Фил со бело чоколадо
- 2 шлаг крема од ванила
- 180гр мелена плазма
- 200гр бело чоколадо
Инструкции
- Чоколадно тесто: Соединете ги состојките за чоколадното тесто и добиената смеса префрлете ја во калап за печење (јас користев бр.26 кружен калап). Печете на 200 степени Целзиусови.
- Чоколаден фил: загрејте околу 50мл млеко со 4-5 големи лажици шеќер. Додајте го чоколадото и откако ќе се стопи, истурете ја смесата врз мешавината од лешници и ореви. Измешајте додека смесата не се соедини и оставете да се излади. Во друг сад изматете го преостанатиот шеќер со маргаринот. Додајте какао, кора од портокал и сок од портокал и соединете ја смесата. Истурете ја оваа смеса во оладените лешници и ореви и префрлете го филот во фрижидер.
- Фил со бело чоколадо: Изматете ги шлаг кремовите од ванила според упатството на ќесичката. Растопете бело чоколадо на пареа и додајте го. Додајте и мелени бисквити и мешајте додека смесата не се соедини. Префрлете го филот во фрижидер.
- Павлова тесто: Почнете да ги матите белките заедно со малку сол. Кога ќе бидат изматени до момент на т.н меки врвови (soft peaks) почнете постепено да додавате шеќер и непрекинато да матите. По неколку минути треба да добиете цврст, сјаен снег од белки. Додајте густин и бел вински оцет и соединете ги во смесата. Загрејте ја рерната на 160 степени Целзиусови. Ставете хартија за печење и истурете го снегот од белките. Обликувајте го според формата на торта што ја имате замислено. Ставете го во рерна и намалете ја на 120 степени Целзиусови. Печете 75 мин. Откако ќе биде готово, исклучете ја рерната и оставете го тестото внатре уште 1 час со подотворена врата.
- На крај, наредете ја тортата. Поделете го чоколадното тесто на два дела и поставете го едниот дел на соодветна чинија за сервирање. Додајте го чоколадниот фил, па Павлова тестото, па филот со бело чоколадо и завршете со вториот дел од чоколадното тесто.
- Изматете хопла и филувајте ја тортата однадвор. Украсете по желба.